Varabrannsjef Johan Stokkeland var møtt opp på fritida for å orientera om det interkommunale selskapet Follo Brannvesen saman med vår lokale brannveteran Knut Moen. Enebakk, Frogn, Nesodden, Oppegård, Ski og Ås kommunar eig det interkommunale selskapet i lag.

Stasjonen i Ytre Enebakk er den mest moderne i distriktet og har deltidsbemanning der fire brannbetjentar til alle døgnets tider er på vakt og skal kunna innfinna seg på stasjonen i løpet av seks minutt. Dei går på vakt på mandag og har vaktskift og tre veker av vakt frå mandagen etter. Under omvisinga i garasjen kunne vi sjå at det nye vaktlaget hadde vore innom og lagt klær, hjelmar, sokkar og andre deler av utstyret sitt klart slik at minst mulig tid skal gå tapt om alarmen skulle gå.

Utvikling i brannvernet

Den topp moderne brannbilen til over 3 millionar kroner vekte stor interesse, men før turen gjekk ned blant dei raudlakka tekniske vindundera,  gav Stokkeland ei orientering om branndistriktets seks stasjonar på Nesodden, i Oppegård, Ski, Korsegården i Ås og Flateby i tillegg til stasjonen i Ytre der vi fekk kaffi og kaker i eit velutstyrt møterom.

Å sjå nybygget innanfrå drog rundt tjue rotarianar frå fjernsynskroken på valgkvalden. Minst like stor interesse vekte Stokkelands engasjerte orientering om utviklinga i brannvesenet dei siste tiåra. Før rykte ein inn i brennande bygg og slokka brannar for einkvar pris. I dag ligg større vekt enn før på sikkerhet for mannskapet. Nytt er også vekta på skadebegrensing, eit arbeid som forsikringsselskapa sparar store summar på og derfor ber kostnadene med i form av utstyr og betaling for meirarbeid og drift.

Større vekt enn før ligg på eit reinare arbeidsmiljø, noko ei diger vaskemaskin sende tydelege signal om. Slokkingsteknikkane har også utvikla seg. ”Før pøste vi på med vatn,” minte Stokkeland om. ”Nå er vi meir opptekne av å finna ut kvar elden får surstoff frå, og blokkera den tilførselen.”

Ny skole i 2019

Brannvernet krev større kompetanse enn før og brannkorpset er i fagleg opprusting. I 2019 opnar ein toårig brannteknisk utdanning i Tjeldsund, femten kilometer frå Evenes flyplass i Nordland.

Der ligg i dag Norges Brannskole som tilbyr vidareutdanningskurs for brannfolk.

Pensjonsalderen for deltidstilsette brannbetjentar er 57 år for dei som går i heilkontinuerlig turnus og 60 år for deltidsarbeidarar. I dag finst det rundt tolvtusen deltidsbrannfolk og 6-7000 som arbeider heiltid. Med den låge pensjonsalderen er turoveren stor. Stokkeland fortel om mange skjarar til nye stillingar, men understrekar at nålauget er trongt.

”Dei vi tek inn, må kunna møta alle menneske med respekt uansett bakgrunn, enten dei er narkomane, prostituerte, snakkar gebrokkent, er gamle eller barn.”

Dramatikk og debriefing

Brannkorpset kjem som andre i nødetatane, opp i mange dramatiske hendelser og brannvesen er i tett samarbeid med ambulanseteneste og politi.: Ved Enebakk brannvesen har debriefing vore fast rutine sidan 1990. ”Er du godt trent fysisk og psykisk, går det bedre,” seier Stokkeland som ytra seg kritisk til dei forsøka på nedskjering som også brannvesenet blir utsette for.

Om framtida kunne han røpa at den største satsinga på brannsikkerheit nå rettar seg mot heimebuande eldre.

Det var ein engasjert flokk rotarianarar som spurde brannfolka ut og nok brann inne med endå fleire spørsmål då vi på overtid reiv oss laus frå dei brannraude vidundera i garasjen og begav oss ut i den regnvåte haustkvelden.

”Vi kan vel nå rekna skogbrannfaren for over i vårt distrikt,” var Stokkelands tørre kommentar.

Publisert av Johnny Rivli 31. oktober 2017